Belhete de eidentidade de l mirandés

[Crónica salida ne l jornal Público (15/01/2006) actualizada (04/01/2010)]

An sítios adonde bou a falar subre la lhéngua mirandesa ou an preguntas, beio siempre ua grande curjidade de las pessonas por saber adonde, cumo i quando naciu essa lhéngua. Bendo bien, ye la mesma curjidade que tenemos culas pessonas que nun coincemos. Assi i todo, anque seia coincida de todos, ua pessona ten un belhete de eidentidade que apersenta un retrato i çclara un manhuço de algues caratelísticas que la puoden çtinguir de las outras, anque séian caratelísticas de fuora i nada mos dígan quanto al fondo dessa pessona. Tal i qual cumo pa las pessonas, tamien podemos apersentar l belhete de eidentidade dua lhéngua, que mos deia las purmeiras anformaçones subre la sue parte de fuora yá que la sue armaçon nun puode relhumbrar nesse retrato. Para quien inda se manténgan ancundesadas las percipales caratelísticas, de fuora, de la lhéngua mirandesa, eiqui deixo l que puode ser l sou belhete de eidentidade.

Nomemirandés.

Filiaçonlhatin.

Parentenalhéngua stur-lheonesa i lhénguas románicas.

Era de nacimientohai alredror de mil anhos.

Morada30 aldés de l cunceilho de Miranda de l Douro i 3 aldés de cunceilho de Bumioso, çtrito de Bergança, Pertual; fui-se pul mundo culs mirandeses que son benediços noutras tierras, falando-se hoije an buonos juntouros nas percipales cidades de Pertual, subretodo Lisboua i Porto.

NacionPertual, çclarada lhéngua oufecial pula lei nº 7/99, de 29 de Janeiro, de la Assemblé de la República.

Modo de se screbircunsante la Cumbençon Outográfica de la Lhéngua Mirandesa (1999) i sue Purmeira Adenda (2000) que se puode achar an www.mirandes.no.sapo.pt. i an www.sendim.net

Ansinoansinada oufecialmente, por scuolha, nas scuolas de l cunceilho de Miranda de l Douro zde 1985/86 i tamien, zde 2001, an cursos dados pula Associaçon de Lhéngua Mirandesa, na region de Lisboua.

Ferramientas“Pequeno Vocabulário de Mirandês-Português”, de Moisés Pires (2004) i dicionairo (an publicaçon) an http://www.mirandadodouro.com/dicionario/, www.sendin.net, www.bragancanet.pt/dicmirandes i www.mirandes.net; gramática screbida por José Leite de Vasconcellos an 1900 (Estudos de Philologia Mirandesa, vol. I); lhiteratura que ampeçou yá ne l seclo XIX i hoije stá siempre a ser acrecentada cul salimiento de lhibros de poesie, quelóquios, cuontas, crónicas i traduçones;

Falantesnun se sabe bien al cierto quantos son, mas andaran por 7 000, talbeç algo mais.

Percipales porblemas perda an relaçon a la fala pertuesa, subretodo an família; abaixamiento de l númaro de moradores na region de nacimiento, por bias la zerterficaçon que se há dado; falta de anstituiçones que la repersénten cumo debe de ser; andebles ajudas de l Stado, central i local; fraco coincimiento ne l paíç i, por esso, andeble cuncéncia de la sue amportança.

Prázio de balidadesin prázio, até que ls mirandeses quérgan.

Outras anformaçones – ber las andicaçones que son dadas ne l percipal blogue de la lhéngua mirandesa http://frolesmirandesas.blogspot.com/, adonde se dan andicaçones de quaije todo l que respeita a la lhéngua mirandesa, remetendo para outros blogues, sítios, etc.

Amadeu Ferreira

4 Responses to Belhete de eidentidade de l mirandés

  1. David Mira diç:

    Olá, gostaria de saber onde poderia arranjar informações de cursos de mirandês, principalmente onde são realizados e os preços.
    Muito obrigado pela disponibilidade, David Mira

  2. niebro diç:

    Buonas nuites David,

    Mandai-me l buosso e-mail i bos anformarei.

    Agora ne l berano stá a decorrer até al die 24 un curso an~Miranda.

    Bai a haber um curso antensibo an Sendin, ne l Festibal Antercéltico, die 31 de Júlio i 1 de Agosto.

    A partir de Outubre/Nobembre haberá un curso an Lisboa. Se me mandardes l e-mail bos poderei nessa altura dar anformaçones.

    Tamien hai cursos on-line, que stan andicados ne l blogue http://frolesmirandesas.blogspot.com Ide alhá a ber.

    Em regra, os cursos são gratuitos.

    Amadeu Ferreira

Deixar ua Respuosta

Fill in your details below or click an icon to log in:

WordPress.com Logo

You are commenting using your WordPress.com account. Log Out / Demudar )

Twitter picture

You are commenting using your Twitter account. Log Out / Demudar )

Facebook photo

You are commenting using your Facebook account. Log Out / Demudar )

Google+ photo

You are commenting using your Google+ account. Log Out / Demudar )

Connecting to %s

%d bloggers like this: